Следната година ќе помине во знакот на Блаже Конески, најавија Министерството за култура и Министерството за образование и наука, кога ќе се одбележува стогодишнината од неговото раѓање.
Македонија на овој начин ќе се приклучи кон одбележувањето на 2021 како Меѓународна година на мирот и довербата, што ја прогласи Генералното собрание на Обединетите нации.
Министерството за култура соопшти дека 19 декември, денот кога е роден Конески, е ставен на листата на значајни јубилеи на УНЕСКО, што ќе се одбележуваат следната година.
„Оваа годишнина заслужува сите актери од културниот, академскиот и општествениот живот да ги мобилизираат своите креативни сили за достоинствено чествување на ликот и делото на Блаже Конески. Министерството за култура и Министерството за образование и наука подготвуваат платформа за усогласување на настаните што ќе се одвиваат на национално и на меѓународно ниво“, велат од Министерството за култура.
