МАНЧЕВСКИ ПОЧНА ДА ГО СНИМА „ВРБА”, ЉУБОВЕН ФИЛМ ЗА ДЕНЕШНИ И ДАМНЕШНИ ДУШИ

    МАНЧЕВСКИ ПОЧНА ДА ГО СНИМА „ВРБА”, ЉУБОВЕН ФИЛМ ЗА ДЕНЕШНИ И ДАМНЕШНИ ДУШИГлавните улоги во „Врба“ ги играат младите актери Никола Ристески и Сара Климоска, првата клапа падна во прилепското село Крушевица (Фото: А. Ристески)

    „Врба“, шестиот долгометражен игран филм на најнаградуваниот македонски режисер Милчо Манчевски, почна да се снима денеска близу прилепското село Крушевица, објави продуцентот „Банана филм“. Ова е прв филм што Манчевски го работи во Македонија, девет години по наградуваниот „Мајки“.

    Во меѓувреме, Манчевски работеше во Њујорк – „Бикини Мун“, неговиот последен филм кој во март годинава ја имаше македонската премиера, а овој месец и њујоршката, е американско-германска копродукција без учество на Македонија.

    Во Крушевица за потребите на снимањето изградени се два филмски сета, со автентични сценографски решенија во духот на времето, кое режисерот сака да го долови во филмот (Фото: А. Ристески)

    „Врба“, по сценарио на Манчевски, е три испреплетени приказни за љубов и доверба – едната од македонското средновековие, другите современи – се огледуваат и се во контраст една со друга. Иако ги раздвојуваат векови, ликовите во „Врба” имаат слични грижи, радости и соништа, велат од продукцијата.

    „Врба“, по сценарио на Манчевски, е три испреплетени приказни за љубов и доверба – едната од македонското средновековие, другите современи – се огледуваат и се во контраст една со друга; – Сара Климоска во сцена од филмот (Фото: А. Ристески)

    „Врба е љубовен филм за денешни и дамнешни души. Не е важно која е темата или пораката на едно уметничко дело, важно е тоа да те допре, расплаче, насмее или налути“, вели режисерот Манчевски.

    Актерот Никола Ристески на првата клапа (Фото: А. Ристески)

    Главните улоги ги играат младите актери Никола Ристески, Сара Климоска, Наталија Теодосиева, Ненад Нацев, покрај Камка Тоциновски. Во филмот играат и Петар Мирчевски, Благој Чоревски, Ратка Радмановиќ, Ана Костовска, Лазе Манасковски, Катина Иванова, Кире Ѓоревски, Адем Карага, Јелена Јованова-Периќ и други.

    дизајнер на продукција е долгогодишниот соработник на Манчевски, Британецот Дејвид Манс (Фото: А. Ристески)

    Снимањето на филмот ќе трае до првата половина од декември и ќе се снима на локации во во живописните мариовски села Штавица, Дуње и Зович, на Трескавец, во Преспанскиот Регион и на различни локации низ Скопје.

    Во Крушевица за потребите на снимањето изградени се два филмски сета, со автентични сценографски решенија во духот на времето, кое режисерот сака да го долови во филмот, а во Штавица ќе се користат веќе постоечки ресурси со дополнително преуредување.

    Директор на фотографија е Унгарецот Тамаш Добош, дизајнер на продукција е долгогодишниот соработник на Манчевски, Британецот Дејвид Манс, костимите се на Жаклина Крстевска и Унгарката Ѓерѓи Сакач, асистент на режија е Никола Ивановиќ од Србија, а кастинг директорка е Милка Анчевска.

    Продуцентот Јане Ќортошев со Манчевски на првата клама во Крушевица (Фото: А. Ристески)

    Продуцент е Јане Ќортошев, а извршен продуцент е Ник Пауел од Велика Британија, легендарниот коосновач на „Вирџин рекордс“ заедно со Ричард Брансон. Филмот е во продукција на „Банана филм“ и е македонско – унгарско – белгиска копродукција, со учество и на Албанија.

    Манчевски е добитник на над 40 меѓународни награди и признанија, меѓу кои и почесен докторат од универзитетот ВГИК во Москва, Златен лав во Венеција, номинација за Оскар, Индепендент спирит, Давид ди Донатело, ФИПРЕСЦИ, УНЕСКО, Сребрен кондор, ЕМ-ТИ-ВИ и други. „Њујорк тајмс“ го вброи „Пред дождот“ меѓу најдобрите илјада филмови на сите времиња. Неговите филмови се предаваат на бројни универзитети на сите пет континенти, а влезени се и во наставната програма на средните училишта во Италија и Турција. Користени се и во наставата во Јужна Кореја. За неговите филмови се одржани две академски конференции, во Фиренца и во Лајпциг.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира