Новата, дигитално реставрирана копија на првиот македонски игран филм „Фросина“ на режисерот Војислав Нановиќ утре ќе биде прикажана во 20 часот во летното кино на Кинотеката. Проекцијата на филмот од 1952 истовремено ќе биде пренесувана во живо и ќе може да се следи на Јутјуб каналот преку линкови објавени на страницата на Кинотеката на Фејсбук и нивната веб страна.

На проекцијата ќе ѝ претходи 10-минутно видео во кое Атанас Чупоски, советник филмолог во Кинотеката, ќе направи кратка анализа на филмот и неговото значење за македонската кинематографија, како и за самиот процес на дигитална реставрација.

„Фросина“ ќе биде достапен за гледање онлајн преку каналот на Кинотеката и во следните 5 денови по оваа дигитална премиера.

Влезот на утрешната проекција ќе биде бесплатен, но со претходно резервирани билети.

„Имав само 27 години, а требаше да играм старица од 70 години. Тоа изгледаше невозможно. Невозможно, како што велеше Нановиќ: ‘Што, таа да ја игра мајка Фросина?!’ Јас го слушав и во себе си реков дека морам да успеам. Отидов кај Лаловиќ – шминкерот – и му реков: ‘Дајте ми само пет минути да одам до театар и да си ја земам мојата перика, со која играм во театарот’. Кога се вратив со периката, се нашминкав, а го замолив Лаловиќ само да ми направи корекции за до го убедам Нановиќ дека можам да ја одиграм улогата….. Влеговме во просторија во која имаше една огромна ужасна справа каква во животот не сум видела, огромна како некој гавран со големо околу, кое ме гледа. Тој ми рече дека пробното снимање ќе почне, а ќе треба да си замислам дека на подот е мојот мртов син…. Текстот го знаев и кога на даден знак камерата почна да снима, јас клекнав на подот и кога го видов човекот што лежеше со затворени очи, блед и неподвижен одеднаш нешто се случи во мене. Не знам од каде ми дојде таков глас, таква сила, само реков: ‘Леле, мајкин сине, белиот ден не го виде…’. Одеднаш почна аплауз, не знам од кого потекна, но знам дека почнаа да ми течат солзи, некоја сила ме повлече, некој порив мајчински. Во тој момент јас бев мајката Фросина. Сите околу мене беа воодушевени, ја осетија трагичноста на тој лик…“, кажа главната актерка Мери Бошкова во 1989, во дискусијата на симпозиумот посветен на првиот македонски игран филм.

„Фросина“ е прва целовечерна играна продукција целосно на македонски јазик, со македонска актерска и филмска екипа, со исклучот на режисерот Нановиќ, и прв игран филм снимен во продукција на „Вардар филм – Скопје“, продуцентска куќа основана во 1947 година.

Минатиот петок Кинотеката ја претстави и дигитално реставрираната копија на првата македонски комедија „Мирно лето“ на режисерот Димитрие Османли, снимен во 1961 година.