Вечерва во 21: 30 часот во паркот Ибни Пајко во Скопје, на фасадата на Националната опера и балет (НОБ) ќе се реализира привремена уметничка интервенција насловена „Картографија на просторното насилство (Случај на градот Скопје)“.
Авторите Тихомир Топузовски и Кумјана Новакова велат дека проектот се фокусира на просторното насилство, односно како репрезентациите и констелациите на моќта се отелотворени во архитектурата и урбаните простори, инструментализирајќи ги граѓаните преку политички мобилизации, идентификации и поделби.
Привремената уметничка интервенција е насловена „Картографија на просторното насилство (Случај на градот Скопје)“
„Во конкретниот случај, проектот преку визуелна методологија и користење на картограм го прикажува просторното насилство во централниот дел на градот Скопје, на тој начин преиспитувајќи го односот помеѓу материјалноста на урбаните простори, згради, споменици, обележја и спектарот на нематеријални процеси, односно симболичките, етничките и социјалните.
Реализиран како привремена уметничка интервенција на фасадата на НОБ овој проект создава дополнителна интеракција осмислувајќи нови значења и разбирање на политички одбележаните простори“, велат Топузовски и Новакова, кои соработуваа со Глигор Постолски, Дрен Невзати и Индрит Османи, како и со Мери Батакоја, Јован Ивановски и студентите на Архитектонскиот факултет во Скопје.
