Тениската легенда Борис Бекер повика да се засили борбата против расизмот, откако член на екстремната десница во германскиот парламент го опиша неговиот син Ноа како „мал полуцрнец“ на Твитер.

„Време е да се кренеме и да излеземе на улица. Овдека и низ целиот свет. Расизмот веќе не смее да се толерира. Никој не се казнува за тоа и на крај се премолчува“, напиша Бекер во колумната за весникот „Велт ам зонтаг“.

Јенс Мајер, пратеник од редовите на десничарската Алтернатива за Германија, го нападна 23-годишниот Ноа по едно негово интервју, во коешто тој се пожали дека еднаш бил нападнат во Берлин поради бојата на кожата.

„Се чини дека малиот полуцрнец добива премалку внимание, тоа е единственото објаснување за неговото однесување“, напиша Мајер, за подоцна да го избрише твитот.

Мајката на Ноа Бекер, кој најави дека ќе го тужи Мајер, има афроамерикански татко, додека мајка ѝ е Германка.