Кратко по зачудувачката кражба на крунските скапоцени камења во Лувр, фотографот на агенцијата Асошиејтед Прес (АП), Тибо Ками, со седиште во Париз, во кадарот фати елегантно облечен млад човек како поминува покрај униформирани француски полицајци, а нивниот автомобил ја блокира една од портите на музејот. Инстинктивно, тој ја сними фотографијата.

Не беше особено одлична фотографија, со нечие рамо кое затскриваше дел од предниот план, си рече Ками. Но, ја заврши работата – покажувајќи ја француската полиција како го затвора најпосетуваниот музеј во светот по дрскиот грабеж среде бел ден минатата недела. Плус, претпостави Ками, човекот што поминуваше покрај полицајците беше невообичаено добро облечен, во тренч мантил, јакна и вратоврска и носеше федора, додавајќи допир на париска мода на сцената. И така, фотографијата се упати кон светската публика на АП.

Оттаму, плодната имагинација се разгоре со голема брзина – разгорувајќи ја онлајн возбудата. Објавите на социјалните мрежи го прогласија добро облечениот човек за француски детектив – ако сакате, поелегантна верзија на познатиот инспектор Клузо од филмовите „Пинк Пантер“ – иако описот на фотографијата на АП не го едентификуваше. Описот едноставно гласеше: „Полициските службеници го блокираат пристапот до музејот Лувр по грабежот во недела, 19 октомври 2025 година, во Париз“.

Објава на X која сега има 5,6 милиони прегледи вели: „Вистинска снимка (не вештачка интелигенција!) од француски детектив кој работи на случајот со француските крунски скапоцености што беа украдени од Лувр“. Друг профил на Х – со 1,2 милиони следбеници – тврдеше дека човекот „кој изгледа како да излегол од детективски филм ноар од 1940-тите е вистински француски полициски детектив кој ја истражува кражбата“.

Ками вели дека ништо што видел не го довело до тој заклучок – човекот беше само некој што заминува од Лувр додека властите ја евакуираат областа, вели Ками.

„Се појави пред мене, го видов, го фотографирав“, вели Ками. „Помина и си замина“.

Ако неидентификуваниот човек навистина е еден од повеќе од 100 истражители кои ги бараат крадците на накит, властите го држат тоа во тајност.

„Порадо би ја одржале мистеријата жива ;)“, соопшти канцеларијата на парискиот обвинител со намигнување во одговорот по е-пошта на прашањата на АП.