Светскиот виртуоз на гитара Влатко Стефановски ја воодушеви публиката на Златна бубамара на популарноста, со изведбата на македонската песна „Учи ме мајко“ заедно со хоровите на Ансамблот за народни песни и ора „Танец“ и на Културно уметничкото друштво „Мирче Ацев“. Гитарскиот мајстор, омилен на светската и македонската публика на сцената на тапани придружуваше неговиот син, Јан.
Стефановски од сцената им се заблагодари на неговата сопруга Гордана, и на неговиот брат, драматургот Горан Стефановски, кои починаа во период од една година.
Публиката во салата си стави маски против загадување, во духот на годинашниот слоган на Златна бубамара на популарноста (Фото: К. Попов)
Полна е салата во ВИП арената „Борис Трајковски“ со политичари, уметници, актери, пејачи, спортисти за 22-то издание на забавната манифестација во организација на Радио Бубамара и Ранко Петровиќ. Како и изминативе години, водител е актерот Сашко Коцев, а награди се доделуваат во над 20 категории.
Меѓу музичарите настапи и хрватскиот пејач Петар Грашо, кој изведе негова песна како и големиот хит „Цесарица“ на Оливер Драгоевиќ.
Ветеранот на македонската музичка сцена Мики Јовановски-Џафер ја доби наградата за трајни музички вредности, а композиторот Григор Копров доби награда за животно дело.
