Рускиот олигарх Аркадиј Ротенберг изјави дека тој е сопственикот на раскошната палата на брегот на Црно Море, а не Владимир Путин, како што тврди притворениот опозиционер Алексеј Навални.

Видеозаписот за огромната палата, објавен од Навални, се прошири на интернет и досега е прегледан над 100 милиони пати. Путин ги отфрли извештаите дека палатата е негова.

Ротенберг, милијардер со тесни врски со Путин и негов бивш спаринг партнер во џудо, денеска излезе во јавност со тврдењето дека е сопственик на палатата.

Аркадиј Ротенберг е и бивш спаринг партнер на Путин во џудо (Фото: Гети)

„Постигнав договор со кредиторите пред неколку години и потоа станав корисник на имотот. Тој ќе биде довршен во наредните години и треба да стане хотелски комплекс“, кажа Ротенберг.

Тој се огласи ден пред најавените нови протести во Русија против притворањето на Навални, чиј тим во почетокот на месецот објави филм за палатата, за која се вели дека вреди 1,3 милијарди долари и дека била платена со „најголемото мито во историјата“. Палатата се наоѓа на имот од 17.691 квадратен метар.