„Гуш и Бац“ е книгата што графичкиот дизајнер и активист Зоран Кардула ја создаде од зборовите на неговата единаесетгодишна аутистична ќерка Ерато Кардула. Книгата содржи измислени 47 зборови на Ерато, преведени на 19 јазици, како и 47 илустрации на нејзините зборови создадени од 33 креативци.
„Гуш и Бац“ ќе биде промовирана вечерва во 19 часот во Националната галерија Чифте амам, придружена со изложба на креациите кои се објавени во книгата. Промоцијата е во чест на одбележувањето на 3 декември, меѓународниот ден на лицата со попреченост. За време на настанот, ќе се продаваат книгата, илустрациите, разгледниците и специјално подготвени беџови, а собраните пари ќе бидат наменети за реедукација, односно работа со дефектолог и логопед на оние деца со аутизам кои не може да си го дозволат тоа.
Кардула, како идеен творец на „Гуш и Бац” вели дека една од најважните цели на проектот е да се подигне свеста за аутизмот и да се придвижи општествената интергација на аутистичните луѓе.
„Ерато е слабо вербална. Има зборови кои умее јасно да ги изговори но и такви кои се само нејзини. Лесно ги изговара зборовите кога се одвоени по слогови за во моментот кога треба да ги спои истите зборовите ги изговара по свое. Зборовите кои таа ги користи се секогаш исти и наменски. Посакувам да можевме да разговараме, но така таа ќе треба да влезе во нашиот свет за кој ја сум сигурна дека не е посреќен од нејзиниот“, пишува во книгата мајката на Ерато, Домника Кардула.
Во текстот на Весна Костовска, пак меѓудругото стои: „Зборовите на Ерато се звукот на нејзиниот внатрешен свет. Мене ми звучат љубопитно, жизнерадосно и топло…
Ерато вели… бибиви. Ние велиме… бонбони. Ерато вели… сита. Ние велиме… цедевита. Таа вели… капи, ние… пуканки.
Можеби Ерато ’нашите’ зборови ги внесува во својот свет, ги пресоздава и го создава својот јазик што ѝ е поудобен, посоодветен, позвучен“.
Во книгата и на изложбата учествуваат авторите Руки Чуки, Ване Костуранов, Марко Јанев, Зоран Кардула, Немања Трајковиќ, Диано Здравковиќ, Шемко, Филип Велковски, Иван Дургутовски, Дијана Димитриевска, Видана Бошкова Мицевска, Александар Илиевски, Ана Стојановска, Анастасија Јовческа, Анастазија Манасиевска, Бисера Крцковска, Васе Петровски Аманито, Венчо Милошевски, Влатко Ристов, Горан Костовски, Дејан Ханџиски, Ѓорѓе Јовановиќ, Ѓорѓи Јаневски, Ебру Али, Елена Андреева, Емилија Мишева Ставрова, Игор Делов, Иван Дургутовски, Мартина Петковска, Мики Стефаноски, Милан Стојанов, Небојша Гелевски, Никола Радуловиќ, Татјана Коцева и Теано Кардула.
Промотор ќе биде Никола Гелевски, модератор Огнен Јанески, а музика ќе пушта Соња Исмаил – Огненоска.
Б. НЕСТОРОСКА
