Барањето за екстрадиција на избеганиот осуден експремиер Никола Груевски е подготвено и очекуваме денес или утре да биде испратено во Унгарија без разлика дали има или нема одлука за неговото барање за азил, изјави министерката за правда Рената Треневска-Дескоска.

„Очекувам денес, најдоцна до утре да се комплетира документацијата. Голем дел е завршено, се чека уште неколку технички документи да се преведат бидејќи документацијата е обемна. Во барањето за екстрадиција, покрај случајот ’Тенк‘ се наведени сите други кривични дела за кои што е обвинет Груевски“, рече министерката Дескоска по обраќањето на конференцијата на Македонското здружение на млади правници во Скопје.

Дескоска кажа дека и да има и да нема одлука за азил од унгарските власти, барањето за екстрадиција ќе биде доставено и додаде дека Македонија очекува тој да не добие азил, откако неколку унгарски медиуми објавија дека одлуката е веќе донесена.

За најавениот закон за помирување и амнестија, Дескоска рече дека сè додека не го види предлогот на парламентарното меѓупартиско тело за помирување не може да каже дали со него ќе бидат опфатени само пратениците или и другите обвинети за нападот во Собранието на 27 април лани. Нејзин личен став е дека за сите осудени и обвинети за насилство не треба да има амнестија.

Г. ТРПЕНОСКИ