Општина Гевгелија ја доби првата депонија во Македонија која е изградена целосно според стандардите на Европската унија. Депонијата се наоѓа во Ново Коњско, за нејзина изградба беа потрошени милион долари, кои ги обезбеди владата на Јапонија, а проектот го имплементираше Програмата за развој на Обединетите нации (УНДП).

Сегашната нелегална депонија, која се протега по брегот на Сува Река, чиј капацитет е одамна надминат и претставува сериозна закана за животната средина и здравјето, ќе биде затворена.

Градоначалникот на Гевгелија Сашо Поцков кажа дека штом почне со работа депонијата, од граѓаните ќе побараат да го рециклираат отпадот.

„Навистина ни е драго што јапонската влада беше во можност да одвои средства за овој вреден проект. Земјата се соочува со сериозни проблеми со одлагање на отпадот и овој проект е пример кој треба да го следат и другите градови и региони“, кажа јапонската амбасадорка Кеико Ханеда.

УНДП помага во обука на лицата кои ќе работат на депонијата, а Винтон кажа дека очекуваат дека наскоро ќе биде довршен патот до депонијата и дека ќе се набават потребните возила за собирање отпад и дека Општина Гевгелија наскоро ќе ја пушти во употреба

„Задоволни што сме пионери во изградбата на првата депонија целосно според стандардите на Европската унија. Но, правењето било што за прв пат знае да биде тешко. Движењето низ бирократските лавиринти за да се обезбедат сите потребни дозволи траеше две години. И тоа се одвиваше пред дури и да почнеме со изградбата. Затоа, им благодариме на нашите јапонски партнери за трпението. Но, сега, кога имаме функционална депонија, очекуваме да стане ‘туристичка атракција’, каде што министри, градоначалници и граѓани можат од прва рака да видат дека депонијата изградена по ЕУ стандарди личи на се, но не на отпад. Се надеваме дека со ова ќе го забрзаме процесот за изградба на петте планирани регионални депонии и исто така сме подготвени да го понудиме нашето искуство како обемната бирократија и прекубројни регулативи можат да се надминат“, рече Луиза Винтон, постојан претставник на Програмата за развој на Обединетите нации.

Таа побара од општината да ја стави во функција депонијата што побргу. УНДП во моментот помага во обуката на лицата кои ќе работат во депонијата, а се очекува во најскоро време да биде завршен патот до депонијата и да се обезбедат возила за отпад и друга потребна опрема.

Депонијата е дел од поголем проект од 2,2 милиони долари, поддржан од јапонската влада, а спроведуван од УНДП како поддршка за општините, кои беа најмногу погодени во бегалската криза во 2015-2016 година.