Претседателскиот кандидат на СДСМ и коалицијата Стево Пендаровски кажа дека глас за него е глас за продолжување на патот кон ЕУ и НАТО, на централниот митинг што се одржа денеска пред ЕУ-инфо центарот во Скопје. Тој кажа дека до пред две и пол години земјава била изолирана и во неизвесност, а денес, како што рече, меѓународната заедница нè гледа како сериозен партнер.
„Од држава изолирана, држава во неизвесност, денес членството во ЕУ и НАТО се реалност што се остварува“, кажа Пендаровски, додавајќи дека со членството во ЕУ можеме да ги решиме децениските проблеми што не мачат.
За противкандидатката Гордана Силјановска-Давкова од ВМРО-ДПМНЕ, Пендаровски кажа дека таа ниту сака, ниту може да биде претседател на сите граѓани.
Детал од атмосферата на митингот (Фото: Ѓ. Личовски)
Покрај Пендаровски, на митингот зборуваа уште лидерот на СДСМ Зоран Заев, поранешниот ракометар Наумче Мојсоски и вицепремиерот за евроинтеграции Бујар Османи.
Претседателските избори ќе се одржат на 21 април и 5 мај.
М. ИЛИОСКИ
