Специјалниот пратеник на германското министерството за надворешни работи за Македонија, Јоханес Хајндл, утре ќе допатува во дводневна посета на Македонија, соопшти денеска германската амбасада во Скопје.

Хајндл, кој воедно е и германски амбасадор во Австрија, за време на посетата ќе има средби со четворицата потписници на Договорот од Пржино, како и со амбасадорот на САД и со другите амбасадори на ЕУ-земјите.

Шефот на германската дипломатија, Франк Валтер Штајнмаер, минатата недела повторно изрази загриженост поради политичката состојба во Македонија, поради што го назначи Хајндл да помогне во наоѓањето излез од ќор-сокакот, во кој влезе политичката криза по аболицијата на политичари и на нивни соработници.

– Амбасадорот Хајндл ќе соработува со Европската комисија и со САД и со други партнери за да ги поддржува во нивното посредување при надминувањето на внатрешно-политичката криза – соопшти портпаролот на германското МНР, Мартин Шефер, на минатонеделната прес-конференција во Берлин.

Хајндл се смета за „тешкаш“ во германската дипломатија и за добар познавач на состојбите на Балканот, имајќи предвид дека бил шеф на одделот за Западен Балкан.