Сојузот на синдикати на Македонија (ССМ) денеска излезе на протест, откако Владата не ги прифати неговите барања за минимална плата од 500 евра. На протестот синдикалците им рекоа на премиерот Христијан Мицкоски, министрите, пратениците и останатите функционери една година да земаат минимална плата за да видат како им е на работнците.

Синдикалците прво ја отворија јавната седница пред зградата на ССМ, а потоа се упатија кон Собранието. Таму побараа пратениците да донесат одлука минималната плата да биде 500 евра и зголемување за 100 евра на платите на работнците.

„Платата на работникот е мизерна, а вашите се за 79 проценти зголемени. Не ја заслужувате таа плата. Бидејќи вие не одлучувате за нас,ние ќе одлучиме за вас и носиме одлука пратениците да бидат на минимална плата сè додека не ја зголемите миналната плата на 500 евра“, рече претседателот на ССМ Слободан Трендафилов.

Потоа, седницата продожи пред Стопанската комора од каде им кажаа на работодавачите да ги зголемат платите на работници, бидејќи секоја година по 10.000 млади луѓе ја напуштаат државата и бараат работа надвор.

Протестот заврши пред Владата, каде синдикалниот лидер Трандафилов му предложи на премиерот Христијан Мицкоски да биде и тој на минимална плата.

„Христијан и Слободан да бидат на минимална плата. Дојдете да живеете како нас, да почувствувате макар и една година колку им е тешко на работниците. Запрате ги нападите врз Синидатите, на таков начин не се води демократија. Не заслужувате 78 отсто повисоки плати. Не можете да одлучувате за минималната плата без нас. Пред 2 години ССМ организираше генерален штрај на целиот јавен сектор, на чекор сме до штрајк во цела држава“, рече Трендафилов.

А. АНТЕВСКА