Премиерот Зоран Заев рече дека предвремените избори на 12 април нема да влијаат на постапката за изградба на нов Клинички центар. Тој рече дека се консултирал со правници што е дозволено за време на техничка влада и дека изборите нема да ја запрат изградбата на новиот Клинички центар.

„Одржавме состаноци и со правниците ги разгледавме сите дозволиви и недозволиви работи за време на техничка влада, пред избори и во кампањата. Видовме дека нема потреба ништо да застане во таквите постапки кои се големи и сериозни за избор на вака големи изведувачи. Паралелно се движат преговорите за кредитната линија од Министерството за финансии, а Министерството за здравство ја заврши првата фаза во делот на техничкиот дијалог“, рече Заев.

Тој кажа дека очекува овие постапки да завршат до крајот на годината, да има конкурентни понуди и заштеда на средства за изградба на Клинички центар.

„Секако Министерството за финансии треба да се избори за најповолни услови во делот на кредитните линии, а Министерството за здравство да се изборат за најконкурентни понуdи. При тоа од Министерството за здравство ќе реалоцира средства на Општина Ѓорче Петров, на Град Скопје и на јавните претпријатија за изградба на инфраструктурата, оти од обиколницата мора да има пристапен пат до центарот, водовод, приклучок на гас и електрична енергија. Сето тоа се проектира за да може напролет да почне со изведбата на инфраструктурата“, рече Заев.

Е. БОЧВАРОСКА