Министерот за здравство Арбен Таравари вели дека не знае како дошло до тоа да се вратат сините картони и најави ќе побара одговорност од тој што ги пуштил во оптек, бидејќи, како што кажа, нема потреба од нив.

„Сини картони нема да требаат. Од денес нема да се бараат сини картони, ниту во примарното здравство, ниту во аптеки. Според бројчето на електронската картичка, дури таа и да е истечена, може во системот да се провери дали граѓаните имаат здравствено осигурување. Јас не знам како дошло до ова да се делат сини картони. Некој изгледа сакаше филм да направи, знаете многу се занимаваат со здравството. Ќе побараме одговорност кој пуштил во оптек сини картони, кога од нив нема потреба“, изјави Таравари на денешната прес-конференција.

Тој најави дека ќе најдат многу подобро решение и наредната недела, заедно со Фондот за здравство ќе имаат состанок со министрите на МВР и на Информатичко општество, бидејќи сакаат да направат една картичка за лична идентификација и здравствено осигурување.

Во подрачната единица на Фондот за здравство во Скопје, неделава граѓани чекаа да си ги подигнат картончињата, за да можат да се лекуваат и да купуваат лекови на рецепт. Вработените на шалтерите ни рекоа дека сите осигуреници на кои ќе им истече здравствената електронска картичка треба да појдат во подрачните единици на Фондот и да си ги подигнат сините картони.