Министерството за внатрешни работи пред вечерашните велигденски собири ги отстрани сите контејнери пред Соборниот храм и околината во Скопје и пред сите други цркви каде се очекуваат помасовни собирања на верници. Од МВР велат дека ова е дел од најавените превентивни безбедносни мерки и активности за заштита на јавниот ред и мир, и безбедноста на објектите и на граѓаните, а контејнерите утре ќе бидат вратени на место.
Откако вчера укажа на зголемена безбедност поради можни терористички напади, МВР денеска информира дека ситуацијата е под целосна контрола.
Вчера МВР соопшти дека „со оглед на глобалните терористички закани во кои што цели се и верски објекти (како што беа неодамнешните напади во Египет), потоа таргетирањето на земјите од Балканот, меѓу кои и Република Македонија, а вклучително и масовните собирања на граѓани, од страна на терористичката Исламска држава (ИСИЛ), МВР ќе ги зајакне безбедносните мерки и активности во наредните денови на целата територија на државата“.
Ова е првпат МВР да воведе мерки за безбедност на целата територија поради закана од ИСИЛ.
Според најновите проценки направени од домашните служби, нема потврдени информации за терористички напади, цитираше денеска Алсат-М ТВ полициски извори. Тие велат дека за заканите кои можат да дојдат од соседните земји или регионот, службите и соодветните институции на Албанија и Косово се во целосна подготвеност да ги спречат. Вчера исто така и косовската полиција ги заостри мерки, па дури преку итна наредба побара од регионалните полиции во Приштина, Гњилане, Урошевац и Призрен да го контролираат секој главен и спореден пат кој води кон Македонија. Полицајците исто така мора да носат и панцири. И полицијата во Албанија соопшти дека е составен посебен план во делот на зголемување на полициското присуство во целата територија на земјата за да се спречат евентуални терористички напади.
И амбасадата на САД во земјава пред два дена ги предупреди своите граѓани да бидат внимателни за празниците и да ги следат локалните медиуми. Амбасадата во предупредувањето вели дека терористи во регионот во минатото планирале напади на лесни цели, меѓу кои цркви и други свети места, трговски центри, спортски арени, концертни сали и јавни собири.
