Од 200 повредени во пожарот во кочанската дискотека „Пулс“ на 16 март, уште 12 се на болничко лекување, од кои 1 е сѐ уште во тешка состојба, рече Сашо Клековски, директор на Фондот за здравствено осигурување (ФЗОМ) на денешната трибина во Владата, „Кочани е наш приоритет“. Во пожарот загинаа вкупно 62 лица, од кои 59 ноќта на 16 март и уште тројца кои подоцна починаа при лекувањето во странство.

Клековски кажа дека според официјалните податоци, од 200 повредени, 187 биле регистрирани на болничко лекување, од кои 116 во странство, а 71 во Македонија.

Од петмината останати на лекување во Македонија, тројца се на Клиниката за пластична и реконструктивна хирургија, тоа се пациенти кои се вратени од странство, и двајца се во „Аџибадем Систина“.

Директорот на Службата за општи и заеднички работи Ивица Томовски рече ека од резервите на Буџетот на државата се одвоени 30 милиони денари за да се пружи помош при транспортот, сместувањето на придружбата на овие пациенти и дека до овој момент се потрошени 21 милион денари државни пари.

„Уште 7 пациенти се на долекување во странство, исто имаат придружба, исто така им се покриваат трошоците за сместување и се надевам дека за брзо ќе ги вратиме назад во нашата држава. Тоа не значи дека тука сѐ завршува. Државата стои на располагање и ќе стои се до оној момент додека не добиеме јасна слика и додека не си ги вратиме пациентите тука назад во Македонија и да ги излекуваме до крај“, кажа Томовски.

Б. НЕСТОРОСКА