ОД ПРВИ ДЕКЕМВРИ КЕСИТЕ ЗА ПАЗАРЕЊЕ ЌЕ ЧИНАТ 15 ДЕНАРИ, СЕ ЗАБРАНУВААТ ПЛАСТИЧНИ ПАКУВАЊА ВО ЗАШТИТЕНИ ПОДРАЧЈА

    ОД ПРВИ ДЕКЕМВРИ КЕСИТЕ ЗА ПАЗАРЕЊЕ ЌЕ ЧИНАТ 15 ДЕНАРИ, СЕ ЗАБРАНУВААТ ПЛАСТИЧНИ ПАКУВАЊА ВО ЗАШТИТЕНИ ПОДРАЧЈАНадоместок од 15 денари за биоразградливи кеси ќе мора да биде евидентиран и пренесен во посебен фонд за животна средина.(Фото: К. Попов)

    Од 1 декември, кесите за пазарање во маркети и продавници ќе бидат 15 денари. Ова се предвидува со новиот Закон за управување со пакување и отпад од пакување, кој заедно со уште три закони за управување со отпад беа изгласани во Собранието и стапија на сила.

    Премиерот Зоран Заев и министерот за животна средина и просторно планирање Насер Нуредини на денешната прес-конференција кажаа дека овие закони ќе овозможат конечно европеизирање на управувањето со отпадот, конечно ќе се реши овој горлив проблем кој се таложел со декади и ќе се прекине синџирот на лошо управување со отпадот.

    „Како Министерство и Влада, скроивме план како да го поддржиме обезбедувањето на таа инфраструктура. Ние напорно работиме на инвестициите во остварување на функционалноста на регионалниот систем за управување со отпадот преку центрите за развој, обезбедување на собирни места и места за селекција, изградба на стандардизирана инфраструктура со трансфер станици и регионални депонии, како и чистење и затворање на сите нестандардизирани односно диви депонии и ѓубришта. Ова е нашиот пат за современо и европско управување со отпадот и здрава животна средина, и го поканувам приватниот сектор и граѓаните, да бидат наши партнери во остварувањето на оваа заедничка цел“, рече министерот Нуредини.

    Нуредини кажа дека во однос на посебните фракции на отпадот, односно за справување со она со што граѓаните се соочуваат најмногу  – пластичното пакување, предвидена е забрана за нивна употреба која ќе стапи на сила од 1 декември. Надоместок од 15 денари за биоразградливи кеси ќе мора да биде евидентиран и пренесен во посебен фонд на Министерството за животната средина и просторно планирање. Исто така, од први декември за првпат се воведува и забрана за еднократна употреба на пластично пакување во заштитените подрачја.

    „Постојат безброј алтернативи од природни материјали, и сметаме дека за почеток, барем во заштитените природни подрачја можеме да покажеме пример со еколошко пакување“, кажа Нуредини.

    Премиерот Зоран Заев каже дека како земја кандидат за членка во Европската Унија, потребно е да се усогласи со европското законодавството и во оваа област.

    „Се погриживме процесот да биде инклузивен и да ги вклучи општините, операторите со отпад и комуналните претпријатија, граѓанските организации, граѓаните. Целта ни беше да создадеме систем кој ќе ги опфати потребите на сите и истовремено и ќе ги опфати високите стандарди за заштита на животната средина. Должни сме и кон идните генерации, да го решиме овој горлив проблем кој се таложел со декади, и да го прекинеме синџирот на лошо управување со отпад. Така ќе постигнеме дома да ни биде чисто, а на идните генерации да им оставиме здрава животна средина“, кажа премиерот Зоран Заев.

    А. АНТЕВСКА

    ЧИТАЊЕТО Е БЕСПЛАТНО.

    АМА НОВИНАРСТВОТО НЕ Е.

    Поддржете го слободното, независно, професионално новинарство. Новинарство со интегритет.

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира