ПОМАЛКУ ОД ЕДЕН ПРОЦЕНТ ОД УЧЕНИЦИТЕ И НАСТАВНИЦИТЕ СЕ ЗАРАЗЕНИ СО КОВИД-19, ВЕЛИ МОН

    ПОМАЛКУ ОД ЕДЕН ПРОЦЕНТ ОД УЧЕНИЦИТЕ И НАСТАВНИЦИТЕ СЕ ЗАРАЗЕНИ СО КОВИД-19, ВЕЛИ МОНВо рамки на наставата со физичко присуство, регистрирани се вкупно 40 ученици позитивни на корона вирусот и 52 вработени од наставниот кадар во средните и основните училишта. (Фото: Ѓ. Личовски)

    Помалку од еден процент од учениците и кадарот во основните и средните училишта се заразени со ковид-19, вели Министерството за образование и наука (МОН).

    Според извештаите кои училиштата секојдневно ги доставуваат до МОН, од вкупниот број 259.235 ученици на ниво на држава процентот на заразени изнесува 0,06 отсто, а од вкупниот број 27.955 наставници и друг кадар овој процент изнесува 0,58 отсто.

    Во рамки на наставата со физичко присуство, регистрирани се вкупно 40 ученици позитивни на коронавирусот и 52 вработени од наставниот кадар во средните и основните училишта.

    „Во сите овие случаи се реагира навремено според препораките на Центрите за јавно здравје, со што се спречува трансмисија на вирусот“, вели МОН.

    Во сите останати случаи станува збор за учесници на онлајн настава, при што ниту децата, ниту наставниците имале контакти со останатите од училиштата. Исто така, учениците и наставниците кои одат во изолација поради близок контакт со заразено лице, или затоа што се позитивни на ковид-19 наставата ја продолжуваат онлајн, со што се обезбедува континуитет во образовниот процес.

    „Министерството за образование и наука апелира учениците, наставниците и родителите доследно да ги почитуваат мерките и протоколите за заштита од ковид-19 во училиштата и надвор од нив, затоа што само со носење маски, држење растојание и често миење и дезинфекција на рацете може да се спречи ширењето на болеста“, додаваат од МОН.

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира