Член на Судскиот совет поднел иницијатива за разрешување на претседателката на Врховниот суд Беса Адеми, откако таа во интервју во САКАМДАКАЖАМ.МК побара одговорност од судии, предупреди на притисоци од функционери и на опасност и закани од разрешување на врховни судии.

• ПРИСУТНА Е ПОЛИТИЧКАТА ЗАКАНА ЗА РАЗРЕШУВАЊЕ НА ВРХОВНИ СУДИИ, АМА НЕМА ОСНОВ ДА ОЖИВЕЕ АБОЛИЦИЈАТА НА ГРУЕВСКИ, ВЕЛИ ПРЕТСЕДАТЕЛКАТА НА ВРХОВНИОТ СУД БЕСА АДЕМИ

Ова следува само една недела откако Судскиот совет, место да го разреши на тие утврдени незаконитости апелациониот судија Енвер Беџети кој 9 месеци без причина го држел предметот на Сашо Мијалков за масовното прислушување, му изрече само парична казна од 20 отсто од платата, која е сега е 78 отсто покачена.

Неофицијално, иницијативата ја поднел членот Миљазим Мустафа, кој не е судија, туку е избран во Собранието од актуелното мнозинство на СДСМ и на ДУИ.

• ПРЕТСЕДАТЕЛКАТА НА ВРХОВНИОТ СУД БЕСА АДЕМИ ИТНО ПОВИКАНА НА СОСЛУШУВАЊЕ ВО СУДСКИОТ СОВЕТ ОТКАКО ВО ИНТЕРВЈУ ЗА САКАМДАКАЖАМ.МК ПОБАРА ОДГОВОРНОСТ ЗА СУДИИ

САКАМДАКАЖАМ.МК праша во Судскиот совет дали е поведена постапка за разрешување на врховен судија, па иако не спомнавме име, оттаму не потврдија, ама ниту негираа. Целиот Врховен суд зборува дека на претседателката ѝ е поведена постапка, а Советот, иако станува збор за прашање од висок јавен интерес, одбива да одговори.

„Не можеме да потврдиме за ниту една иницијатива за дисциплинска постапка, зашто знаете дека постапката е тајна“, рекоа од Судскиот совет.

• ПРВИН ДА КАЖЕТЕ ЗА ПРИТИСОЦИТЕ ВРЗ ДАМЕВА И ЦРВЕНКОВСКА, ПА ПОСЛЕ ВИКАЈТЕ МЕ НА СОСЛУШУВАЊЕ ЗА ДАДЕНО ИНТЕРВЈУ, МУ КАЖА БЕСА АДЕМИ НА СУДСКИОТ СОВЕТ

Не е јасно кои се причините поради кои ја зема Судскиот совет на „заб“ претседателката на Врховниот суд, кој беше еден од ретките пофален во штотуку објавениот Извештај на Европската комисија за напредокот на Македонија кон ЕУ. Сè почна по нејзиното интервју објавено на трети ноември, кога Судскиот совет веднаш ја повика на сослушување за кажаното.

• ПРЕТСЕДАТЕЛКАТА НА ВРХОВНИОТ СУД БЕСА АДЕМИ И ГОДИНАВА ОД ЕВРОПСКАТА КОМИСИЈА ДОБИ ПОФАЛНИ НАВОДИ ЗА РАБОТАТА НА НАЈВИСОКИОТ СУД

Како претседателка на Врховниот суд, највисокиот суд во државата, право и обврска ѝ е да укаже пред граѓаните на притисоци, на закани и девијации во судството кое има рејтинг и доверба под 2 проценти.

Таа во интервјуто во САКАМДАКАЖАМ.МК , на прашањето „Како изгледаат тие притисоци? Со уцени за разрешување ли?“, навести дека Судскиот совет се спрема да ја разреши.

„Политиката секогаш има потенцијал да користи влијанија на различни начини. Реално, секогаш е присутна заканата дека може да се разрешуваат судиите на Врховниот суд и во овој правец да се користат дури и лажни вести. И затоа Судскиот совет треба да биде заштитник на судството“, беше јасна Адеми.

С. К. ДЕЛЕВСКА