Специјалната јавна обвинителка се надева дека нејзиниот единствен сведок за случајот со незаконското прислушување „Пуч“ Никола Груевски ќе се појави во судницата, а судот ќе побрза со закажување рочишта.
“Ако ме слуша Основниот суд Скопје 1, кој го одложи судењето за случајот „Пуч“ дури за месец и пол, зашто поротник се разболел, нека го презакаже за први октомври. Спремна сум да дадам воведно излагање. Се надевам ќе дојде и единствениот мој сведок Никола Груевски“, повика вчера специјалната обвинителка Катица Јанева од Комисијата за политички систем, откако пратеникот Димитар Стевананџија и други пратеници од владејачкото мнозинство и забележаа дека и по 13 месеци СЈО не одговори кој прислушувал, во кој период, за какви цели и кој му ги дал прислушуваните материјали на лидерот на СДСМ Зоран Заев.
Освен што го обвини и во оваа прилика Кривичниот суд што го кочи почетокот на судењето за “Пуч“ случај кој треба да одговори кој прислушувал и кој му ги дал материјалите на Заев, Јанева во одговор на прашањата на пратениците од Комисијата за политички систем на оваа тема, додаде и дека е точно оти има нови необјавени разговори кои таа ги преслушала и дел од нив, заедно со доказите во некои од постапките, му се предадени на Судот.
“Судот за нив ќе се произнесе“, рече Јанева за новите необјавени разговори. Додаде и дека во тие само 12 отсто преслушани разговори, имало приватни разговори. Зоран Заев во тие 12 отсто го немало како прави разговори за тендери, одговори Јанева, а имало повеќе таргети за слушање, на кои биле налепени и функционери и обични граѓани.
Седницата на Комисијата е во тек, а како што е најавено ќе трае до 23 часот вечерва.
