Раководителката на Инспекцискиот надзор Мери Проја-Продановска, утринава во Охрид кажа дека и покрај забраната за работа поради пандемијата со коронавирус, 22 угостители и туристички работници за продолжениот викенд ги отвориле капацитетите и сместувале гости.
„Од петокот досега се утврдени 22 непочитувања на владините мерки од страна на категоризираните сместувачки и угостителски објекти и врз основа на членовите 205 и 206 од уредбата за истите ќе бидат поднесени кривични пријави“, рече Проја-Продановска.
Најголемиот дел од прекршувањата 8 се во Охрид, 4 во Струга, 5 во Битола, 3 во Дојран, и по едно во Маврово и Кочани. При направените надзори било утврдено присуство на гости во сместувачките објекти иако засега тоа не е дозволено. Исто така, кај двајца угостители од Охрид е утврдено непочитување на протоколите и работното време.
Државниот пазарен испекторат и денеска продолжува со засилен надзор на правни субјекти на Охридското крајбрежје, а контроли се вршат со полициска асистенција, со цел да обезбеди максимално почитување на мерките и протоколите за заштита од КОВИД-19.
С. К. ДЕЛЕВСКА
