Кривичниот суд во Скопје, односно судија на претходна постапка, утре ќе одлучува по барањето на Специјалното јавно обвинителство за притвор на бизнисменот Сеад Кочан, првоосомничен во случајот „Труст“, пренесе „Мета“. СЈО потврди дека сослушувањето е закажано за утре во 10 часот и на него, како и претходниот пат, ќе присуствуваат обвинител на СЈО и адвокатите на Кочан, кои треба да ги соочат доказите и аргументите „за“, односно „против“ предлогот да му биде оредена мерка притвор на Кочан.
СЈО во предметот „Труст“ го сомничи Кочан дека во 2011 година на тендер на „Електрани на Македонија“ (ЕЛЕМ) за ископ на јаловина доставил фалсификувани документи за наводна техничка и кадровска опременост на неговата компанија и на тој начин заедно со уште две фирми незаконски наплатил 17,2 милиони евра. Специјалната јавна обвинителка Фатиме Фетаи кажа дека меѓу доказите се три прислушувани телефонски разговори, од кои два не се објавени во јавноста. Тендер за ископ на јаглен, каков што е под истрага во „Труст“, се споменува во разговорот меѓу поранешниот премиер Никола Груевски и поранешниот директор на ЕЛЕМ Владо Чинговски, објавен во 14. бомба на опозицијата. Во разговорот, Груевски му кажува на Чинговски дека „се сретнал со кратовчанецот и со тој што има кола Сеат ибица“ и го советува директорот на ЕЛЕМ „да ја организира работата и да се сите задоволни“.
Сеад Кочан, по два месеци во бегство, се врати назад во земјава и е хоспитализиран на Клиниката за кардиологија.
Повторното одлучување на Кривичниот суд за притворот на Кочан следува откако во петокот минатата недела Врховниот суд, постапувајќи по барање за заштита на законитоста, доставено од Јавното обвинителство, реши да ги укине претходните одлуки на Основниот суд Скопје 1 и на Апелацискиот суд Скопје, од март оваа година, со кои на Кочан му беше одреден притвор и по него беше распишана потерница. Врховниот суд го врати предметот на повторно одлучување во Основниот суд Скопје 1, а Кривичниот совет на овој суд вчера експресно ја спроведе пресудата и предметот го врати на почетокот, односно кај судија на претходна постапка.
Иако најави, СЈО досега не излезе со реакција на одлуката на Врховниот суд.
Хелсиншкиот комитет за човекови права на Република Македонија смета дека постапувањето на Врховниот суд кој го укина противорот за Сеад Кочан е преседан кој е во спротивност со принципот на владеење на правото. Хелсиншкиот комитет нагласи дека ова е првпат кој и да било суд во Македонија да одлучи дека лицето против кое е определен притвор треба да се пушти на слобода до донесување одлука по жалба.
