Основното јавно обвинителство Скопје вели дека е проширена истрагата за обидот за убиство на пратеникот Зијадин Села за време на нападот во Собранието на 27 април и по барање на надлежен јавен обвинител петмина осомничени се лишени од слобода при вршење на претрес во нивните домови. Во текот на денот ќе бидат преземани дејствија за утврдување на факти и спрема останати лица, додаваат од ОЈО.
„Во врска со постапката што се води во Основното јавно обвинителство Скопје за настаните во Собранието на Република Македонија од 27 април и нападот врз Зијадин Села, надлежен јавен обвинител донесе Наредба за проширување на истрага за уште 5 лица за сторено кривично дело Убиство во обид сторено во соизвршителство, од чл.123 во врска со чл. 19 и во врска со чл.22 од Кривичниот законик“, соопшти ОЈО утринава.
На 10 мај, МВР ги приведе лицата К.Ѓ. (39) и Ц.Ѓ. (68), кои се татко и син, за кои полицијата утврдила дека физички го нападнале и го влечеле лидерот на Алијанса за Албанците Зијадин Села. Исто така, по наредба на судија на претходна постапка, полицијата тогаш извршила претрес на домот на К.Ѓ. при што „биле пронајдени и подигнати патики со траги слични на крв, облека и три мобилни телефони, кои со потврда за привремено одземени предмети му се одземени“. На двајцата им беше одреден притвор.
