Африканските тркачи доминираа и на 15. издание на Виз ер Скопски маратон, освојувајќи ги првите три места и во машка и во женска конкуренција. Од нив, дури четири доаѓаат од Кенија, а голем успех оствари и Адријана Поп Арсова, која постави нов државен рекорд.
Чалачев Асмамау Тирунех од Етиопија е победникот на годинашниот маратон, откако стигна на целта за 2:15:37 часа, а на подиумот му се придружија Кениецот Корир и сонародникот Гелав.
Најдобропласиран домашен маратонец, исто како и лани, е Александар Кираџиев, кој имаше време од 2:37:41 час, што беше доволно за шестото место. Во првите десетмина имаше уште еден домашен тркач, Марјан Бонев на деветтото место.
Јунис Нјавара Мучири го предводеше тројниот триумф на Кенијките (Фото: К. Попов)
Кај жените, троен триумф на Кенијките. Најбрза меѓу нив беше Јунис Нјавара Мучири со време од 2:33:38 часови, а зад неа се пласираа Јулитер Џепчирчир Тануи и Наоми Какоко Лимамуреи.
Поп Арсова заврши на седмото место, и тоа со време на нов државен рекорд од два часа, 52 минути и 52 секунди.
На полумаратонските трки, Унгарката Зита Качер (1:22:53) славеше пред Македонката Миљана Ристиќ (1:27:09), а кај мажите триумфираше Дарио Ивановски од Македонија со време од 1:12:31 час.
На годинашниот Виз ер Скопски маратон имаше рекордна бројка од 12.500 учесници, од кои 1.500 странци од 58 држави.
