Кенијката Бригид Косгеи го истрча најбрзиот маратон на сите времиња во женска конкуренција, за да ја одбрани титулата во Чикаго.

Дваесет и петгодишната Косгеи ја истрча делницата од 42,2 километра за два часа, 14 минути и четири секунди и за повеќе од една минута го надмина рекордот на Пола Редклиф од Лондонскиот маратон во 2003. Токму Косгеи славеше во Лондон оваа година, при што стана најмладата победничка на сите времиња.

Резултатот на Редклиф беше најдолговечниот рекорд во маратон досега во двете конкуренции. Редклиф беше една од првите кои ѝ честитаа на Косгеи во целта.

„Среќна сум затоа што ова не го очекував. Но, чувствував како моето тело се движи и движи и решив да одам по рекордот“, кажа Косгеи.