Енди Мареј изјави дека планира да се повлече од тениските терени по годинашниот Вимблдон, но стравува дека нема да го дочека тоа и дека Отвореното првенство на Австралија ќе му биде последен турнир.

Трикратниот гренд слем победник, кој тешко заздравува од операцијата на колкот, се расплака на денешната прес-конференција во Мелбурн, во пресрет на стартот на Австралија опен.

„Не сум сигурен дали во овие болки ќе можам да продолжам да играм уште четири-пет месеци. Сакам да играм на Вимблдон и тука да се повлечам, но не сум сигурен дали ќе успеам во тоа“, кажа 31-годишниот Шкотланѓанец.

Поранешниот светски рекет број еден го оперираше десниот колк минатиот јануари и од враќањето на терените во јуни има одиграно само 14 мечеви.

„Не се чувствувам добро. Се мачам долго време. Имам болки веќе 20 месеци. Сега сум подобро отколку пред шест месеци, но сѐ уште не можам да играм на посакувано ниво“, додаде Мареј.

Тој го освои Ју-Ес опен во 2012, за потоа да стане голем британски спортски херој кога триумфираше на Вимблдон наредната година, што го повтори во 2016.