Кристијано Роналдо и Лео Меси играа на шест светски првенства, но Енрике Макаја Маркес бил на трипати повеќе. Во новинарската кариера долга седум децении, 91-годишниот Аргентинец известувал од 18 светски првенства по ред.

Првото му било во 1958, кога сведочел на појавата на тогаш 17-годишниот Пеле. Макаја имал 24 години кога го пратиле на тоа првенство во Шведска.

Една од првите работни задачи му била да го следи натпреварот Бразил-Австрија, но неговото прво сеќавање е она што стана познато како „шведска катастрофа“ – поразот на Аргентина од Чехословачка со 6:1.

„Ова останува врежано во моето сеќавање како огромен пораз на аргентинската репрезентација. Не знаевме речиси ништо за Чехословачка. Немавме никакви информации и податоци, а тие нè изненадија“, кажа Макаја.

Речиси седум децении подоцна, Макаја го виде фудбалот како се трансформира до непрепознатливост. Тој известуваше за Пеле, Диего Марадона, Лео Меси и безброј други одлични играчи. Телевизијата стана дигитална, статистиката стана моментална, а светските првенства се проширија во глобални спектакли.

Аргентина повторно стигна до полуфиналето и се подготвува да се соочи со стариот противник Англија. Макаја верува дека Аргентина има голема шанса да го повтори успехот од 2022.

Тој очекувано го истакна Меси како омилен играч, но не одговори така сигурно кога го прашаа кој е најголемиот на сите времиња.

„Тоа прашање заслужува само насмевка. Нема начин да се мерат играчите низ историјата. Времињата се променија. Секој играч е уникатен. Можам да кажам кој лично ми се допаѓа, но тоа не значи оти верувам дека тој играч бил најдобар во историјата“, вели Макаја.

По речиси 70 години известување од најголемиот спортски настан во светот, пензионирањето на Макаја конечно е на повидок.

„Ќе се пензионирам во одреден момент“, вели тој низ смеа.