Машката ракометна репрезентација со три порази го заврши учеството на Европското првенство во Унгарија и Словачка откако изгуби и од Данска со 21:31 и првпат откако игра на големите натпреварувања се враќа дома без освоен бод.

Дуелот со Данска беше без резултатско значење за двете селекции. Македонија веќе немаше никакви шанси за пласман во следната фаза и беше далеку од уште едно изненадување против големиот противник, како во Скопје во квалификациите.

Ова беше селекторско деби за Кире Лазаров на големите натпреварувања и требаше да биде простување како репрезентативец, но поради повреда не можеше да настапи. Поради повредите и коронавирусот располагаше со значително подмладен тим, кој треба да биде основа на идната репрезентативна генерација.