Бугарскиот премиер Бојко Борисов ги обвини своите политички противници дека го напаѓаат со компромитирачки материјали со цел да го спречат да спроведе два важни геостратешки проекта во јули: влез на земјата во банкарската унија и во еврозоната.

Тој реагираше откако во бугарските медиуми се појавија фотографии од неговата спална соба, на кои се гледа како спие, но и пиштол. На денешната прес-конференција, Борисов го обвини претседателот Румен Радев за шпионажа.

Фотографиите наводно се направени во резиденцијата на Борисов и прво беа објавени на сајтот „Афера“

„Претседателот Радев си дозволи да крене дрон и да ме снима. Неверојатно! Кога ќе му кажам на моето обезбедување дека ќе го урнам дронот, тој го прибира. Го праќа на мојата тераса, неколку пати го прати и до влезот“, изјави Борисов.

Фотографиите прво беа објавени на сајтот „Афера“ и според анонимниот автор, направени се во спалната соба на резиденцијата на Борисов. Јавното обвинителство најави дека ќе покрена истрага.

„Целта е да ме уништат психички, а потоа и да ме нападнат физички. Загрижен сум, затоа што кога спијам, беспомошен сум. Од ова ќе извлечам многу поуки, дури и како да спијам. Можеле и гол да ме снимат“, кажа Борисов.