Во пристаништето во Сиднеј, Австралија, пристигна брод за крстарење со околу 800 патници со ковид-19. Бродот отпловил од Нов Зеланд. Околу 4.600 патници и членови на екипажот се на бродот – што значи дека околу еден од пет има ковид.

Ова потсетува на епидемијата на ковид на бродот „Руби принцес“ на почетокот на 2020, каде што најмалку 900 луѓе беа позитивни, а 28 починаа.

Маргерит Фицџералд, претседателка на операторот за крстарење Карневал Австралија, чиј брод беше и „Руби принцес“, рече дека голем број случаи почнале да се откриваат на половина пат од 12-дневното патување. Сите случаи биле или асимптоматски или благо симптоматски, рече таа. Персоналот ќе им помогне на сите гости со позитивен тест „со пристап до приватен превоз и сместување за да го завршат нивниот период на изолација“, рече таа. Бродот наскоро ќе замине за Мелбурн.

Бројот на болни од ковид се зголемува низ Австралија, само во Нов Јужен Велс за една недела има 19.800 нови случаи.