Дванаесет лица загинаа, а десетици се ранети во бранот руски напади низ Украина. Украинската војска соопшти дека Русија лансирала 158 беспилотни летала и проектили, воздухопловните сили велат дека „никогаш не виделе толку многу локации нападнати истовремено“.

Русија „го употреби речиси секој вид оружје во својот арсенал“, а погодени се домови и породилиште, изјави украинскиот претседател Володимир Зеленски.

Беа нападнати градови низ Украина, меѓу кои и главниот град Киев, Лавов на запад, Одеса и Запорожје на југ и Днипро и Харков на исток.

Нападите се откако САД засега го одобрија последниот пакет помош за Киев. Еден од соработниците на претседателот Зеленски денеска рече дека на Украина ѝ треба поголема поддршка од Западот.

Претходно оваа недела, Украина ракетираше руски воен брод во окупираното кримско пристаниште Феодосија.