Министерот за здравство на Германија Јенс Шпан изјави дека ширењето на коронавирусот во земјата е ставено под контрола благодарение на рестриктивните мерки.
„Бројот на нови случаи на зараза опадна значително, особено ако ги гледаме бројките од ден за ден“, кажа Шпан.
Според здравствените власти, стапката на зараза паднала до толку што сега десет носители на вирусот можат да го пренесат на само седум луѓе. Во почетокот на март, овие десет носители би заразиле 30 луѓе.
Во последните 24 часа, во Германија има 3.380 новозаразени, со што вкупната бројка порасна на 133.830, од кои повеќе од половина веќе заздравиле. Починале 3.868 пациенти, од кои околу 300 се нови.
Релативниот успех на земјата во справувањето со епидемијата најмногу се должи на широкиот обем на тестирање. Ангела Меркел веќе најави постепено олеснување на ограничувањата.
