Грчката влада инсистира дека вакцинираните лица ќе ги имаат повеќето привилегии откако земјата ќе се врати во нормала и дека нема да има повторни затворања во економијата и во социјалниот живот само за да се заштитат оние кои одбиваат да се вакцинираат против ковид-19.

Весникот „Катимерини“ објави дека во случај на четврти бран на пандемијата, ќе се затвораат фирмите кои на работа ги примаат и вакцинираните и невакцинираните работници. Оние што не се вакцинирани ќе имаат ограничувања и во патувањата, па на островите ќе можат да одат само ако претходно се тестираат.

Властите признаваат дека Грција сè уште е далеку од постигнување колективен имунитет, бидејќи досега е вакцинирано само 35,54% од населението.

„Пораката на владата е јасна: вакцинираните можат да се вратат во нормален живот, а невакцинираните не можат. Од септември нема да има општи рестриктивни мерки, туку само локализирани и тоа ќе се однесува само на луѓето кои не се имунизирани“, изјави вицепремиерот Акис Скерцос.

Тој додаде дека се укинува финансиската поддршка за компаниите, а вакцинираните постепено ќе се враќаат во животот што постоеше пред пандемијата, што веќе е почнато.

„Само 0,28% од вакцинираните се заразиле со коронавирус, што значи дека ризикот од зараза кај оваа група е многу мал“, рече Скерцос.