Неколку земји го потврдија својот прв случај на коронавирус и сите се поврзани со неговото неодамнешно ширење во Италија.
Заразените во Хрватска, Австрија и Швајцарија се луѓе кои претходно биле во Италија, исто како и првиот случај во Алжир. Првиот позитивен тест е регистриран и во Јужна Америка, Бразилец кој неодамна престојувал во Италија.
Хрватска утрово го потврди и вториот случај, брат на заразениот млад маж кој минатата недела бил во Милано на натпреварот од Лигата на шампионите, Аталанта-Валенсија.
Во последните четири дена, 11 луѓе починаа во Италија од коронавирусот, а 322 се заразени. Сите починати се возрасни лица, најчесто над 80 години, кои веќе имале сериозни здравствени проблеми.
„Во Италија има доста стара популација и тоа може да објасни зошто смртноста изнесува 2-3%. Постарите се поранливи, тоа може да се види и кога е сезона на обичен грип. Од грип можеме да ги заштитиме, но за КОВИД-19 засега нема вакцина, па оттука и поголема смртност“, изјави Џовани Реца, директорот на Инфективниот оддел во Националниот здравствен институт во Рим.
Италија е меѓу земјите кои се најпогодени од коронавирусот, но нејзините соседи велат дека затворањето на границите би било несразмерно.
Италијански лекар во хотел во Тенерифе имал позитивен тест на коронавирус, а нови случаи на заразени пријавија и Франција и Германија, исто така лица кои биле во Италија.
Во Кина вчера починале 52 луѓе, со што вкупната бројка порасна на 2.715. На светско ниво сега има повеќе од 80.000 заразени.
