Израелските напади врз болницата Насер во Газа денеска убија најмалку 20 лица, меѓу кои и петмина новинари, од кои еден работеше за Ројтерс, соопштија палестинските здравствени претставници. Снимателот Хусам ал-Масри, ангажиран во Ројтерс, беше убиен во првиот напад, според официјалните лица. Фотографот Хатем Халед, кој исто така беше ангажиран во Ројтерс, беше ранет во вториот напад врз болницата, рекоа тие.
Сведоци рекоа дека вториот напад се случил откако спасувачите, новинарите и другите луѓе се упатиле кон местото на првичниот напад. Видеопреносот во живо на Ројтерс од болницата, кој го стримуваше Масри, одеднаш се исклучи во моментот на првичниот напад, покажаа снимките од Ројтерс.
Израелската војска и Канцеларијата на премиерот немаа непосреден коментар во врска со нападите.
Здравствените власти во Газа ги именуваа другите тројца новинари како Маријам Абу Дага, за која Асошиејтед Прес (АП) соопшти дека работела како фриленсер за АП и други медиуми од почетокот на конфликтот во Газа, Мохамед Салама, за кого Ал Џезира, со седиште во Катар, соопшти дека работел за радиодифузерот, и Моаз Абу Таха. Меѓу убиените е и еден спасувач, додадоа здравствените власти.
Палестинскиот синдикат на новинари го осуди Израел за нападите, велејќи дека тоа претставува „отворена војна против слободните медиуми, со цел да се тероризираат новинарите и да се спречат да ја исполнат својата професионална должност да ги разоткријат своите злосторства пред светот“.
Повеќе од 240 палестински новинари се убиени од израелски напад во Газа од почетокот на војната на 7 октомври 2023, според Палестинскиот синдикат на новинари.
