Северна Кореја планира да лансира уште три шпионски сателити, да изгради воени дронови и да го зголеми својот нуклеарен арсенал во 2024 како дел од напорите да ја засили својата војска, објавија државните медиуми. Ким Џонг Ун најави дека односите со Јужна Кореја ќе претрпат фундаментална промена, додека американската политика неизбежно води кон војна.

Ким жестоко го нападна Вашингтон во долгите забелешки на крајот на петдневните состаноци на владејачката партија, на кои се поставуваат економски, воени и надворешнополитички цели за следната година.

„Поради непромислените потези на непријателите да нѐ нападнат, јасно е дека војна може да избие во секое време на корејскиот полуостров. Обединувањето со Јужна Кореја веќе не е можно зашто Сеул ја третира нашата земја како непријател“, изјави Ким.

Односите помеѓу двете земји се во лоша состојба. Минатиот месец, Северна Кореја го лансираше својот прв шпионски сателит, по што го раскина договорот со Јужна Кореја за намалување воени тензии. Северна Кореја исто така редовно изведуваше тестирања на проектили со среден и долг дострел оваа година, вклучувајќи интерконтинентален балистички проектил.

Ким кажа дека ѝ наредил на војската да биде подготвена да ја „смири“ целата територија на Јужна Кореја, дури и со нуклеарни бомби ако биде потребно, во случај на напад.

„Јужна Кореја е претворена во напредна воена база и нуклеарен арсенал на САД. Ако внимателно ги погледнеме дејствата на непријателските сили, зборот војна стана реалност. Северна Кореја нема избор освен да продолжи со своите нуклеарни амбиции и да ги продлабочи односите со земјите кои им се спротивставуваат на САД“, изјави Ким.