Севернокорејскиот лидер Ким Џонг Ун ѝ нареди на војската, индустријата за муниција и нуклеарното оружје на неговата земја да ги забрзаат подготовките за војна за да се спротивстават на, како што ги нарече, невидени конфронтирачки потези на САД, објавија државните медиуми. Говорејќи за политичките насоки за новата година на клучниот состанок на владејачката партија во земјата, Ким рече и дека Пјонгјанг ќе ја прошири стратешката соработка со „антиимперијалистички независни“ земји, објави новинската агенција КЦНА.
Северна Кореја, меѓу другото, ги проширува врските со Русија, бидејќи Вашингтон го обвинува Пјонгјанг дека ѝ доставува воена опрема на Москва за нејзината војна со Украина, додека Русија обезбедува техничка поддршка за да ѝ помогне на Северна Кореја да ја унапреди воената подготвеност.
Јужнокорејскиот претседател Јун Сук Јеол денеска ја посети воената единица на фронтот во источниот округ Јеончеон за да ја провери нејзината одбранбена положба и повика на итна одмазда ако има некаква провокација од Северна Кореја.
За време на партискиот пленум, севернокорејскиот лидер Ким ги изложи и економските цели за новата година, нарекувајќи ја „одлучувачка година“ за остварување на петгодишниот план за развој на земјата, соопшти КЦНА. Северна Кореја претрпе сериозен недостиг на храна во последниве децении, вклучително и глад во 1990-тите, често како резултат на природни катастрофи.
Меѓународните експерти предупредија дека затворањето на границите за време на пандемијата со ковид-19 ја влоши состојбата со храната. Се проценува дека производството на земјоделски култури во Северна Кореја се зголемило во 2023 година поради поволните временски услови. Но, официјален претставник на Јужна Кореја рече дека количината е сè уште далеку под она што е потребно за да се реши хроничниот недостиг на храна во земјата.
