Кои се демонстрантите кои вчера упаднаа во зградата на американскиот Конгрес откако присуствуваа на говорот на Доналд Трамп кај Белата куќа?
Некои носеа симболи и знамиња на одредени идеи и фракции, а снимките покажаа поединци поврзани со екстремни и крајнодесничарски групи и поддржувачи на теории на заговор што се шират онлајн.
Џејк Анџели е добро познат поддржувач на теоријата на заговор „Кјуенон“ (Фото: Гети)
Меѓу најпрепознатливите ликови беше маж со обоено лице, крзнена капа и рогови и со американско знаме во рацете. Тој е идентификуван како Џејк Анџели, добро познат поддржувач на мистериозната теорија на заговор „Кјуенон“, која тврди дека Доналд Трамп и таен тим на воени разузнавачи водат војна против сатанистички педофили во редовите на Демократската партија. „Кјуенон“ со недели најавуваше дека планира марш пред Конгресот.
Ричард Барнет е човекот кој упадна во канцеларијата на Ненси Пелоси (Фото: ЕПА)
Други лица забележани како упаѓаат во Капитол се членови на крајнодесничарската група „Прауд бојс“. Основана во 2016 година, сите нејзини членови се бели мажи и антиимигрантски настроени. „Прауд бојс“ и движењето „Стоп на кражбата“ ги охрабруваа своите членови да излезат на маршот.
Таканаречените „патриотски карвани“ и други иницијативи се организираа онлајн за да се обезбеди превоз на активисти до Вашингтон.
Човекот кој беше снимен како седи во канцеларијата на спикерката на Претставничкиот дом Ненси Пелоси е идентификуван како Ричард Барнет од Аркансас, познат како поддржувач на движењето „Стоп на кражбата“ и на групи за правото на користење на оружје.
