Меган Маркл се врати кај својот син Арчи во Канада додека во Бакингамската палата се водат дебати за нејзината идна улога, како и на принцот Хари, во кралското семејство.
Војводата и војвотката од Сасекс завчера ја шокираа Бакингамската палата со објавата дека планираат да се повлечат од своите кралски должности и дека сакаат да станат финансиски независни. Кралското семејство изјави дека е повредено од нивната одлука.
Меган и Хари само што се вратија во Велика Британија откако шест недели беа на семеен одмор.
„Можам да потврдам дека таа е во Канада“, изјави портпаролка на Маркл.
Хари и Меган го оставиле синот во Канада, каде што за него се грижеле дадилка и пријателки на војвотката.
Извор од Бакингамската палата изјави дека кралицата, принцот Чарлс и принцот Вилијам побарале од свои соработници да пронајдат применливо решение за плановите на Хари и Меган да станат финансиски независни.
„Меган од старт намераваше да се врати во Канада. Таа дојде во Велика Британија само заради неколку средби и потоа веднаш замина назад“, изјави изворот за агенцијата ПА.
Меган и Хари кажаа дека во иднина сакаат да поминуваат време и во Велика Британија и во Северна Америка.
