Претседателот на САД Доналд Трамп се очекува да ја посети првата дама Меланија Трамп во болница, каде таа беше подложена на процедура за лекување на бенигна состојба на бубрезите.
Од Белата куќа велат дека посетата на медицинскиот центар на Волтeр Рид се очекува да биде подоцна денеска.
Портпаролот на 48-годишната прва дама кажа дека зафатот бил успешен и дека немало компликации. Меланија Трамп најверојатно ќе биде хоспитализирана до крајот на неделата.
Белата куќа не даде дополнителни детали за состојбата на првата дама.
Таа последен пат беше видена во јавноста минатата среда на настанот во Белата куќа, со кој се одаде почит на мајките и жените на војниците по повод Денот на мајката.
