Турскиот претседател Реџеп Таип Ердоган вети дека Израел ќе плати цена за геноцидот во Газа, додека светот одбележува една година од почетокот на крвавата и уништувачка војна, која во меѓувреме се прошири и во Либан.

„Не треба да се заборави дека Израел порано или подоцна ќе ја плати цената за геноцидот што го спроведува веќе една година и го продолжува“, напиша Ердоган на Икс.

Тој го опиша израелскиот премиер Бенјамин Нетанјаху како „касапот на Газа“ и го спореди со Адолф Хитлер.

„Како што Хитлер беше запрен од алијанса на човештвото, на ист начин ќе бидат запрени и Нетанјаху и неговата убиствена мрежа. Свет во кој никој нема да сноси одговорност за геноцидот во Газа никогаш нема да пронајде мир. Долгогодишната израелска политика на геноцид, окупација и инвазија мора да заврши“, кажа Ердоган и повика на признавање на палестинската држава.

Од почетокот на војната во Газа загинаа речиси 42.000 луѓе и не се знае судбината на уште 10.000.