Израелскиот премиер Бенјамин Нетанјаху рече дека неговата тричасовна средба со државниот секретар на САД Антони Блинкен била „позитивна“ и оти била „водена во добар дух“. Американскиот државен секретар по деветти пат е во посета на регионот од почетокот на израелската војна против Хамас во октомври лани. САД изразија оптимизам за договор за прекин на огнот по обновувањето на разговорите во Доха минатата недела.
Сепак, Хамас рече дека сугестиите за напредок се „илузија“, при што голем број прашања меѓу двете страни сè уште се спорни – вклучително и дали ќе се бара од израелските трупи целосно да се повлечат од Газа. Претходно истиот ден Блинкен се сретна и со израелскиот претседател Исак Херцог и рече дека тоа е „веројатно најдобрата, можеби и последната можност“ да се обезбеди прекин на огнот и договор за ослободување на заложниците во Газа.
„Работиме за да се осигураме дека нема ескалација, нема провокации, дека нема дејствија што на кој било начин би можеле да не оддалечат од надминување на овој договор или за ескалација на конфликтот на други места и со поголем интензитет“, рече Блинкен за неговиот состанок со Херцог. Тој рече дека тоа е „веројатно најдобрата, можеби и последната можност“ да се ослободат заложниците и да се постигне прекин на огнот.
Во соопштението од кабинетот на Нетанјаху по неговиот разговор со Блинкен се вели: „Премиерот ја повтори посветеноста на Израел на последниот американски предлог во врска со ослободувањето на нашите заложници – земајќи ги предвид безбедносните потреби на Израел, на кои тој цврсто инсистира“.
Тековните преговори се засноваат на изменет предлог претставен од САД, чија цел е да се премостат долгогодишните јазови меѓу Израел и Хамас. Американците се надеваат дека ќе можат да го постигнат договорот следната недела. Но, тоа ниво на оптимизам не го делат ниту израелското раководство ниту Хамас. Секој го обвинува другиот за тврдоглав цинизам и блокирање договор.
Во изјавата во неделата, Хамас го обвини израелскиот премиер Бенјамин Нетанјаху дека става „пречки“ на патот на договорот и „поставува нови услови и барања“ со цел „продолжување на војната“. Се додава дека го смета за „целосно одговорен“ за спречување на напорите на посредниците и за „попречување на договорот“.
