Најмалку едно лице е прободено и 20-тина се уапсени, откако синоќа во Вашингтон се судрија илјадници поддржувачи на претседателот Доналд Трамп кои протестираа  против резултатите од претседателските избори и контрадемонстрантите. Поддржувачи на Трамп вчера се собираа и во други градови, бидејќи не сакаат да ја прифатат победата на демократот Џо Бајден и ја оспоруваат легитимноста на изборите.

Широка коалиција на највисоки владини официјални лица и лица од информатичката индустрија изјавија дека изборите од 3 ноември и пребројувањето на гласовите помина без пречки, со минорни вообичаени неправилности, и ги прогласи за „најбезбедни избори во историјата на САД“, побивајќи ги напорите на Трамп да го оспори интегритетот на изборниот процес. Бајден води со голема предност во клучните држави и ниедна од тие минорни неправилности не може да го смени изборниот резултат.

Релативно мирните протести во текот на денот, станаа насилни во приквечерието, а ескалираа рано утрината. Властите соопштија дека ќе се поднесат голем број на пријави, меѓу кои за напад и поседување оружје. Двајца полицајци се повредени, а најдени се и доста пиштоли.

Трамп ги одобри собирањата и ги поздрави додека со неговата поворка се движеше низ поддржувачите на пат кон клубот за голф.

„Само сакам да знае дека го поддржуваме“, изјави Антони Витакер, еден од демонстрантите.