Доналд Трамп изјави дека можеби ќе побара од европските земји да ослободат дел од своите резерви на дизел, додека размислува за забрана за извоз на горивото од САД поради глобалниот недостиг. Неговиот министер за финансии Скот Бесент побара од Европа веднаш да подготви и ослободи залихи, велејќи дека американските земјоделци, камионџии и бизниси не треба да трпат додека цените растат.

САД се заканија дека ќе го ограничат извозот на дизел поради зголемените трошоци поради војната во Иран.

Владимир Путин вчера изјави дека Русија нема да го испорачува својот дизел на светските енергетски пазари сè додека не се укинат санкциите против Москва. Говорејќи на форумот „Валдај“ во Москва, Путин рече дека Украина делумно ги постигнала своите цели со нападите врз руските рафинерии, кои, според него, ја чинеле Русија 1% од нејзиниот бруто-домашен производ.

Трамп минатиот месец изјави дека украинските напади врз руските производствени капацитети предизвикуваат глобален недостиг на дизел и ги зголемуваат цените, при што го повика Киев да ги запре тие напади.

„Русија има доволно дизел, но тој нема да стигне до глобалните пазари поради забраните и санкциите воведени против нашата нафта“, кажа Путин.

Велика Британија вчера одржа разговори со европските партнери за можно пуштање во оптек на резерви на дизел како одговор на евентуална американска забрана. САД се клучен снабдувач на дизел за светот, со извоз од 1,2 до 1,5 милиони барели дневно, а експертите предупредуваат дека забраната за испораки во странство би можела дополнително да ги зголеми цените во другите земји.

„Многу сериозно размислуваме за тоа“, изјави Трамп. 

Бесент кажа дека европските земји треба веднаш да ослободат дел од своите резерви на дизел.

„Нашите европски партнери треба да го забрзаат исполнувањето на постоечките обврски и веднаш да обезбедат дополнителни испораки за да се справиме со тековните прекини“, изјави Бесент.

И кинеските рафинерии наводно го запреле извозот на одредени горива за октомври, бидејќи Пекинг му дава приоритет на снабдувањето на домашниот пазар.