Руската група која се мешаше во претседателските избори во САД во 2016 повторно се обидува да го прави истото преку мрежа на лажни профили и интернет страница замаскирана во левичарски информативен сајт, објавија Фејсбук и Твитер.

Фејсбук кажа дека растурил мала мрежа која била дел од руска операција за влијание врз изборите и која се поврзува со Истражувачката интернет агенција (ИРА), организација поддржана од Кремљ. Твитер, пак, суспендирал пет профили од истата мрежа.

Во центарот на операцијата е „ПисДата“, кој тврди дека е непрофитен информативен сајт на англиски и арапски јазик.

Фејсбук објави дека отстранил 13 профили и две страници кои имале за цел да влијаат врз јавната дебата во САД и во други држави.

„Оваа операција постигнала многу мал успех. Страницата на англиски јазик добила само 200 следбеници“, објави Фејсбук.

ИРА е една од трите руски компании кои министерството за правда на САД ги обвини за мешање во изборите во 2016.