САД достигнаа рекордни 40.000 нови случаи на коронавирус во еден ден, објави Универзитетот Џонс Хопкинс.
Последниот пораст на бројот на новозаразени и хоспитализирани придонесе некои сојузни држави и градови да ги одложат плановите за укинување на рестриктивните мерки.
Досегашниот рекорд беше 36.400 нови случаи на 24 април, кога се спроведуваа и помалку тестирања.
Во САД досега има 2,4 милиони заразени и над 122.000 починати од КОВИД-19, најмногу на светот. Здравствените власти проценуваат дека вистинските бројки би можеле да бидат и десет пати поголеми. Центарот за контрола на зарази и превенција објави дека 20 милиони Американци можеби се заразени со коронавирус.
Ново жариште е Тексас, каде што има речиси 6.000 нови случаи на зараза.
