Американскиот министер за одбрана Лојд Остин изјави дека постојат докази дека севернокорејските војници пристигнале во Русија, но допрва ќе се види што ќе прават.

„Би било многу, многу сериозно доколку се подготвуваат да се борат со руските војници во Украина, како што кажа Киев. Што прават во Русија, останува да видиме“, кажа Остин.

Украинскиот претседател Володимир Зеленски неодамна кажа дека две единици со околу 12.000 севернокорејски војници би можеле да земат учество во војната во Украина, за што се повика на разузнавачки информации.

„Ако нивната намера е да учествуваат во војната на страната на Русија, тоа е многу, многу сериозно“, додаде Остин.

Кремљ ги отфрли наводите дека Северна Кореја испратила воен персонал во Русија, додека Јужна Кореја кажа дека во Русија веќе пристигнале 3.000 војници и ќе следат уште илјадници.

„Пјонгјанг ветил дека ќе обезбеди вкупно 10.000 војници, чие распоредување треба да биде довршено до декември. Во септември и октомври имало обуки во рамките на Северна Кореја и се чини дека војниците сега се испратени во повеќе тренинг-центри во Русија со цел да се прилагодат на локалните услови“, изјави јужнокорејскиот пратеник Парк Сун-вон.

Остин смета дека Русија побарала помош од Северна Кореја зашто се соочува со недостиг на регрути.