Амбулантно возило натоварено со експлозив беше детонирано во центарот на Кабул, убивајќи најмалку 95 луѓе, според последните информации.
Напаѓачите поминале полициска контрола во улица којашто е отворена само за вработени во владата, при што експлозијата се случи покрај старата зграда на министерството за внатрешни работи и канцелариите на Европската Унија.
Талибаните соопштија дека ја преземаат одговорноста за самоубиствениот напад, кој е најсмртоносен во Афганистан во последните неколку месеци. Пред една недела, тие извршија напад и врз луксузен хотел во Кабул, при што загинаа 22 луѓе, повеќето странски државјани.
„Полицијата сфати дека се подготвува напад кај втората контролна точка, но не успеа да ги сопре напаѓачите“, кажа портпаролот на министерството за внатрешни работи, Насрат Рахими.
Тој додаде дека бројот на загинати сигурно ќе порасне, бидејќи има и најмалку 150 повредени.
